Ո“ր մթերքները կարելի է սառեցնել, որոնք` ոչ

Դեռ մեկ հարյուրամյակ առաջ մարդիկ ստիպված էին ուտել միայն սեզոնային մրգեր ու բանջարեղեններ, բայց այն պահից, ինչ հայտվեցին սառնարաններն ու սառցախցիկները, սննդակարգը կարելի է բազմազան դարձնել մշտապես: Ավելին, հետազոտությունները ցույց են տալիս, որ ձմռանն ու վաղ գարնանն օտագործվող սառեցված մրգերն ու բանջարեղենն ավելի օգտակար են, քան նրանք, որոնք տեսնում ենք սուպերմարկետների դարակներին:

Իհարկե, որպեսզի սառեցված մթերքը չկորցնի իր օգտակարութունը, պետք է իմանալ որոշ առանձնահատկություններ, օրինակ այն, որ դրանք պետք է շատ թարմ լինեն:

Պետք է չմոռանալ նաև, որ կան մթերքներ, որ կարելի է հանգիստ սառեցնել, և կան մթերքներ, որոնք խորհուրդ չի տրվում, ընդհանրապես, սառեցնել:

Եվ այսպես, ո՞ր մթերքներն է կարելի սառեցնել, որոնք` ոչ

Բանջարեղեն: Թարմ բանջարեղենը մաքրում են, լվանում, կտրատում ու սառեցնում չափաբաժիններով` շատ հաճախ թեթև շոգեխաշելուց հետո: Այդ գործընթացն ազդում է բնական ֆերմենտների վրա և սառեցնելուց հետո կարող է փոխվել բանջարեղենի համը, գույնը, որակը: Ճակնդեղը պետք է սառեցնել եփած կամ քերած վիճակում և ձմռանն օգտագործել: Գազարն ու դդումը կարելի է սառեցնել հում կամ եփած, քերած կամ կտրատած` կախված նրանից, թե ինչ ճաշատեսակ եք պատրաստելու: Պղպեղը կտրատում են և սառեցնում հում կամ շոգեխաշած վիճակում: Կարելի է նաև լոլիկ սառեցնել, միայն հարկ է հաշվի առնել, որ այն կարող եք օգտագործել միայն ուտեստներ պատրաստելու համար, քանի որ լոլիկը, սառելով, կորցնում է առաձգականությունը: Նեխուրն ու գլուխ սոխը սառեցնելիս դրանք փափկում են, բայց դա չի խանգարում ուտեստների մեջ օգտագործել: Սմբուկը ևս արժե շոգեխաշել` նախքան սառեցնելը:

Հիշե՛ք, այն բանջարեղենը, որը շատ ջուր է պարունակում (վարունգ, հազար, բողկ) հում վիճակում չի կարելի սառեցնել, փոխարենը` կարելի է սառեցնել պյուրեի տեսքով:

Մրգեր: Խնձորը, տանձը, դեղձը սառեցնելիս խորհուրդ է տրվում դրանց վրա կիտրոնի հյութ ցանել: Ծիրանն ու սալորը կիսեք և նոր միայն սառեցրեք` առանց կորիզների, սակայն օգտագործելիս մի թողեք, որ հալչի. կոմպոտ պատրաստեք կամ խմորի մեջ օգագործեք` սառը վիճակում: Չի կարելի սառեցնել բանանը, սեխը, ցիտրուսային մրգերը (կարելի է սառեցնել դրանց հյութը կամ կեղևը):

Հատապտուղներ: Դրանք կարելի է սառեցնել, հետո լցնել տոպրակների մեջ կամ միանգամից լցնել տարաների մեջ: Ոմանք սիրում են սառեցնել մրգերը շաքարի փոշիով կամ շաքարավազով: Ելակը` սառելով, փափկում է, ուստի ավելի լավ է պյուրե պատրաստել: Բալը կարելի է կորիզահան անել, կարելի է նաև թողնել կորիզներով:

Կանաչի: Թարմ, լվացրած կանաչին կարելի է առանց կտրատելու դնել սառցախցիկը, կտրատել ու լցնել տարաների մեջ կամ սառցե խորանարդիկներ պատրաստել ու ջուր ավելացնել:

Միս: Սառցախցիկը դնելուց առաջ հարկավոր է միսը չորացնել ու մանրակրկիտ փաթեթավորել` բաժանած նախընտրած մասերի:

Ձուկ, ծովամթերք: Ձուկը ցանկալի է մտցնել աղաջրի մեջ, հետո լցնել տոպրակների մեջ կամ փաթաթել փայլաթիթեղով:

Ծովախեցգետինների գլխիկները պետք է հեռացնել:

Թռչնամիս: Այն կարելի է սառեցնել և՛ ամբողջությամբ, և՛ կտրատած:

Արգանակ և ապուրներ: Փորձեք սառեցնելուց առաջ նախապես հեռացնել յուղն ու եփած կարտոֆիլները:

Խմոր և թխվածք: Սառնարանում շատ լավ պահպանվում են խմորի տարբեր տեսակներն ու դրանցով թխված առանց կրեմի խմորեղենները: Հաճախ սառեցնում են բլիթներ (միջուկով կամ առանց), պելմենիներ և այլն:

Կաթնամթերք: Կարագն ու մարգարինը կարելի է հաջողությամբ սառեցնել, պանիրը կարելի է սառեցնել նաև քերած վիճակում, իսկ կաթնաշոռը սառցախցիկում պահել չի կարելի. այն դառնում է ջրալի: Կաթը կարելի է սառեցնել միայն կարճ ժամանակով:

Ընկուզեղենը շատ լավ պահպանվում է սառնարանում:

Ձու: Սառեցնելու համար հարկավոր է առանձնացնել սպիտակուցը դեղնուցից կամ թերևակի հարել այն:

Մակարոն, բրինձ և կարտոֆիլ: Այս մթերքները թարմ վիճակում ավելի համեղ են, բայց երբեմն պետք է սառեցնել:Հիշե՛ք, որ եփած կարտոֆիլի կտորները սառեցնել չի կարելի, այն հնարավոր չէ օգտագործել սննդի մեջ: Իսկ եթե ստիպված եք սառեցնել, ապա պատրաստի կարտոֆիլից պյուրե պատրաստեք: Բրինձն ու մակարոնը սառցախցիկում փոխում են իրենց համը:

Խմիչք. հյութերն ու գինին կարելի է լցնել սառույցի տարաների մեջ և օգտագործել:

Պատրաստի ճաշատեսակներ: Կարելի է սառեցնել թխվածքները, կարկանդակները, բանջարեղենային ուտեստները, կոտլետները և այլն:

Հարցեր, պատասխաններ, մեկնաբանություններ